既然啱啱分享咗隻G-Shock，就順便開箱埋隻同時間拎到既錶啦。
今次係 Oris 既 Aquis 紐約港限量腕錶，限量二千隻，不過入手既原因同限唔限量無關，一字記之曰：超靚呀喂！
本來都無乜留意Oris，不過上次買隻G-Shock 既時候走去碌時間廊個Facebook，無意間發現呢隻 Aquis New York Harbor Limited Edition，不銹鋼錶殼，加呢隻珍珠貝面淺錄色，最重要係襯埋條綠色膠錶帶，係意想不到咁配合！
坦白講，我對綠色錶一直都無乜興趣，那怕係炒到癲既綠綠綠黑呢啲，去親朋戚友屋企既時候上過手。。。
當刻心諗："🤔 ER… 有乜咁特別？同靚又好似唔係好扯得上關係。。。"
不過口頭上當然講："靚喎，係唔錯喎。。。。" 🤣
嗱，外貌協會呢啲好主觀，係覺得佢唔靚就唔靚架啦，不過總會有堆人話你唔識貨甚或係葡萄撚。。。（施主請便～～）
好喇，講返隻錶。俾佢吸引當然係個樣先，之後再睇隻錶個介紹先知係支持一個想喺2035年前喺紐約港養返十億隻蠔既計劃。一黎可以清海水，二黎可以養返多啲蠔，據聞當地蠔既數量唔夠高峰期既一個巴仙咁話。想知多啲詳情自己去Google吓啦
Oris 好似除咗有義工去幫手清蠔殼之外，仲用隻錶去帶保育呢個話題出黎的確係唔錯既做法。錶主應該點都會得個知字，朋友之間亦可能會傾，不錯唷～～～
跟盒入面有一枝換錶帶既工具同埋多一條鋼帶
到返隻錶真身， 41.5mm 不透鋼錶殼，亞州人黎講大小適中。
貝母綠錶面，唔同角度睇有唔同效果，每隻錶既面都係獨一無二。
當日去到專門店訂錶既時候只係得返一個quota，但係拎錶日有兩隻可以揀，作為一個吸引力法則既信徒，當然揀呢隻一路黎發（1608）啦🤑
膠帶呢個組合真係無得彈，換鋼帶之後反而無咗個味道
戴上手真心覺得靚，膠帶都幾軟好貼手，雖然唔似得oysterflex有中間突起嗰舊膠，但係都OK wor
動力儲存有 38 小時，機芯係Oris 733，base on Sellita 既 sw200-1，亦eta-2824，唔知Oris有無改動或者加強咗乜，亦唔知會唔會同樣存在手動上鏈會掃牙既問題，不過隻錶跟三年保養（登記埋MyOris），應該唔洗擔心太多。
其實呢個價位用乜機芯真係唔太在意。再加上我真係外協架咋！😈
最後補返啲唔同角度既錶面效果😅
人生第一隻綠錶開心分享鉛筆✏️
Hoting.life 