第一次聽到G-Shock呢個名應該係初中既時候，當年Casio呢個品牌對我黎講係計數機既代名詞，所以當知道G-Shock竟然係Casio出，第一感覺係有趣！第二係貴！皆因學生哥無乜錢。第三先係的確幾有型。而隨住年紀越大，對G-Shock都仲係無乜感覺，可能對我黎講個質感實在太膠？太厚？所以之後都無乜再留意。
但係個零月前喺網上見到呢隻GA-2100既Full Metal版，就真係令我對G-Shock有啲改觀！
真心覺得幾好睇，除咗走去當時K11既Booth睇實錶之外，仲即時去時間廊問有無錶，可惜當時係未有既。
我家姐夫都係愛錶之人，知道之後就推介咗一間喺佐敦既錶舖，話八月底有錶，咁當然都係一個字：訂啦！仲講？！
收錶到依家都有成個星期，一直都未戴，就順便出篇開箱啦，GOGOGO
個盒係咁，但係當日老版拎另一隻色俾我姐夫睇，係個鐵盒黎🤔，不過無所謂，又唔係戴個盒，哈😂
個人覺得三隻色入面黑色實錶係最好睇，銀有啲膠，銅有啲玩具，所以當然係揀黑色
GM-B2100 成功瘦身，又有返啲金屬質感，加上個外型設計，相信唔少人都真心覺得：呢隻得喎！
功能上有太陽能充電、藍牙連接手機App – Casio Watches（唔係G-Shock Connected呀），個App可以set alarm，調時間等、計時器、倒數器、每小時提示、第二時區、仲有LED燈添！ 不過我相信大部份人都係覺得佢"型"先買，功能次要吧
我隻營養不良前臂圍大約 17 CM，錶帶原裝長度拆咗六格。上手感覺唔錯，不失為一隻CASUAL出街型型哋既黑鋼，收貨！
帶扣有微調，自己調教都相當簡單。
最後講吓價格，我訂既時候大約四千，老板話之後買嗰啲應該無呢口價咁話。
嗱，錶既野好主觀，七八位數字又有，三位數都有，各有各喜好。我個人而言，以呢個價位黎講，隻G-Shock算係唔錯啊～
既然講開男人野，下篇就繼續開箱另一隻同期入手既錶啦。
純自言自語新錶開箱報告鉛筆✏️
Hoting.life 